Kamis, 23 Jan 2020
radarkediri
icon featured
PERSIK KEDIRI

Ewonan Persikmania Melu Konvoi

Ora Gawa Helm, Ditilang karo Polisi

10 Desember 2019, 18: 06: 10 WIB | editor : Adi Nugroho

persikmania

KUDU TERTIB: Polisi ngatur peserta konvoi Juara. Sing ora tertib lan ora nggawe helm langsung dikon minggir banjur langsung kenek tilang. (Anwar Basalamah - radarkediri.id)

Share this          

KOTA, JP Radar Kediri – Ewonan uwong tumplek-blek neng dalanan Kota Kediri, Sabtu wingi (7/12). Mergane, Persikmania nganaake konvoi ngerayakne juarane Persik Kediri neng Liga 2 Indonesia. Kajawine bapak-bapak lan bocah enom, uga ana suporter wedok lan bocak cilik sing melu mubeng-mubeng kutha.

          Konvoi diwiwiti jam 09.00. Arak-arakan pemain Persik iku dibudalne saka Stadion Brawijaya, Jalan Ahmad Yani. Saka kono, rombongan nglewati Jalan PK Bangsa, Jalan Erlangga, Jalan Hayam Wuruk lan Jalan Brawijaya. Banjur iku menggok nengen lewat Jalan Mayor Bismo lan Jembatan Semampir.

          Rombongan mari ngono nglewati Mojoroto sampai Tamanan lan Jalan Semeru sing tembus neng Alun-Alun Kota Kediri. Ben ora macet, arak-arakan dilewatne nengen neng Kelurahan Ngronggo banjur Tinalan lan Rumah Sakit Baptis.

          Sakdurenge tekan Simpang Lima Gumul (SLG), konvoi Persikmania nglewati PG Pesantren lan Desa Tugurejo, Kecamatan Ngasem, Kabupaten Kediri. Terus rombongan mbalek maneh neng stadion lewat Jalan Airlangga, Katang sekirane jam 11.00.

Neng dalan, Persikmania numpak sepeda motor. Ana sing dewean. Ning, luweh akeh sing boncengan karo kancane utawa bojo lan anake. Nalika pemain lan manajemen Persik numpak truk sing wis dibodi. Dadine, senadyan numpak mburi, pancet aman gawe pemain. Apa maneh, ana pemain sing munggah neng endase truk karo nyekel piala.

          Neng turute dalan, akeh warga sing ngenteni kovoi ngarep omahe. Dheweke kabeh melu bungah amarga Persik dadi juara Liga 2 Indonesia. Malah, bocah cilik ya melu sorak-sorak karo ngrekam konvoi gawe hapene dewe-dewe.

          Ning sing disayangke, ana rombongan sing ora matuhi lalu-lintas. Dheweke kabeh ora gawe helm. Makane, polisi sing nyegat neng dalan kepeksa nilang sing nglanggar. Soale, sadkurunge konvoi, Kasatlantas Polresta Kediri AKP Indra Wibowo uwis menehi imbauan. Kudu tertib lalu-lalu lintas lan kelengkapane kendaraan kudu dirampungke.

          Manajer Persik Kediri Benny Kurniawan nuturake, kira-kira ana 5.000 uwong sing melu konvoi. Soale, Persikmania akeh sing nyegat neng dalan terus melu mlaku gawe sepeda motor. “Alhamdulillah kabeh lancar,” jarene Benny.

          Marine konvoi, pemain langsung mlebu mes maneh. Nalika Persikmania melu rewang ngresiki Stadion Brawijaya.   

(rk/baz/die/JPR)

 TOP
 
 
 
Follow us and never miss the news
©2020 PT Jawa Pos Group Multimedia