Selasa, 19 Nov 2019
radarkediri
icon featured
Politik
Suluh Kadhiri

Kudu Antre, Rencana Ekskavasi Candi Klotok Kelakon Taun Iki

30 September 2019, 19: 23: 37 WIB | editor : Adi Nugroho

candi klotok

SEJARAH KADHIRI: Wali Kota Kediri Abdullah Abu Bakar nalika marani lokasi panemuan candi anyar ing daerah Gunung Klotok. (Didin Saputro - radarkediri.id)

Share this          

KOTA, JP Radar Kediri – Wujude struktur situs ing salah sawijining puncak bukit Klotok, Kelurahan Pojok, Kecamatan Mojoroto, sampun kasingkap. Utamane sakwise tim arkeologi saking Balai Pelestarian Cagar Budaya (BPCB) Jatim nglakokake proses ekskavasi pirang-pirang dina kapungkur.

Saka kagiatan kuwi, BPCB mastikno manawa ing situs ana candi saka bata. Perkiraane bangunan bersejarah kuwi isik sak lokasi karo wilayah Goa Selomangleng.

Patirtan Gunung Klotok

Patirtan Gunung Klotok (radarkediri.id)

“Sejatine kita wis nindakake peninjauan ing 1994 lan 2006. Nanging nembe iso nglokoni ekskavasi tahun iki,” tutur Kepala Unit Penyelamatan dan Pengamanan Cagar Budaya BPCB Jatim Nugroho Harjo Lukito.

Nugroho omong, ing 1994, nate nglakoni kajian pile integrity testing (PIT) ing struktur candi. Kala sakmana BPCB isih kasebut Balai Pelestarian Peninggalan Purbakala (BP3) Trowulan. “PIT tes kangge ndeleng apa bangunan ing Gunung Klotok kuwi situs utawa dudu,” tembung Nugroho.

Ing 2006, BPPC ndelok maneh situs Klotok kuwi. Sawise 12 taun lawase, akhire ekskavasi nyata-nyata kelakon. “Sejatine kita wis suwe pingin nindakake ekskavasi. Amarga ana temuan liyane lan petugase setitik akhire pindah nang ekskavasi situs liyane disik,” jare Nugroho nerangake masalahe.

Sanadyan durung didhuduk kabeh, Nugroho mastikno yen wujud strukture bangunan kuwi candi. Sakdurunge sing ketara mung bungkahan bata sing morat-marit.

“Ekskavasi kapisan isa kasebut setengah luwih. Struktur lan bentuke candi wis ketara. Merga kuwi kita bisa ngira-ira wujud sak kabehe,” ucape Nugroho kala ditemui Jawa Pos Radar Kediri ing sela-sela kagiatan ekskavasi (14/9).

Nugroho nuturna maneh, wujud candi rupa bujur sangkar. Ana lara undak-undakan ing bagian ngarep (sisi kulon). Nanging salah sijine wis rusak. Amarga kena cukulan wit-witan sing nyebabno rusake konstruksi bangunan.

Sajeroning wektu, bagian duwur candi ketutup wit-witan. Oyote mlebu ing sela-sela candi. Kahanan kuwi sing nyebabake akeh kerusakan.  Luwih-luwih, ana pirang-pirang lumahan candi sing miring lan arep rubuh.

“Kita ora bisa weruh wujude struktur ing bagian ngarep candi. Amarga konstruksi undak-undakane wis ilang,” ucape Nugroho negesi.

Ananging, ing sisi ngarep kuwi tim BPPC mastikno yen sik ana sisa-sisa sing nduduhake yen biyen ana undak-undakan kuwi. Lan, ing awake candi ketok rata lan polos. Ora ana relief sing dadi hiasane. Awake candi sing kasisa durung diekskavasi kira-kira 60 sentimeter.

“Awake candi sing durung diekskavasi kuwi isa dadi model yen mengko rekonstruksi,” ucape maneh.

Ing sisi liyane maneh, pondasi candi ana loro bagean. Masing-masing bagean kuwi kasusun saka bata akehe sanga. Mung, pondasi kapindo ana ing lumahing tanah. Pondasi kuwi luwih sempit ketimbang pondasi pisanan sing ana ing sajeroning tanah. Sing duwure 70 cm saka lemah.

Wali Kota Kediri Abdullah Abu Bakar nyempatake ndelok proses ekskavasi kasebut. Yaiku ing dina pungkasan. Abu Bakar nyampekake karepe Pemkot Kediri ekskavasi candi ing Gunung Klotok kawit 2010. Abu uga wis ngirim surat kangge BPCB Jatim. Mung durung bisa kelakon amarga akeh situs liyane sing butuh ditangani luwih disik.

“Kala iku kudu antre. Baru isa kelakon ing tahun iki,” pangucape  Wali Kota Abu Bakar.  

(rk/rq/die/JPR)

 TOP
Artikel Lainya
 
 
 
Follow us and never miss the news
©2019 PT Jawa Pos Group Multimedia